Lotayamm

search
မာတိကာ

contents

ထိပ်ဆုံးစာမျက်နှာ > ဝတ္ထုများ

ပန်းရဲ့ ရိုက်ချက်
အစ/အဆုံး
သုမောင်

မိုးက သဲသဲမဲမဲ ရွာနေတယ်။ တစ်ဖက်ရပ် တဲကလေးပေမယ့် မဆိုးပါဘူး။ ဖွင့်ထားတဲ့ဘက်ပဲ မိုးရေနည်းနည်း စဉ်တယ်။ လေမတိုက်တာ ကြောင့်လည်း ဖြစ်ပါလိမ့်မယ်။

ကျွန်တော်က တဲအပြင်ဘက်က မိုးပြင်ကို ကြည့်နေတယ်။ နောက်ခံ လမ်းမီးတိုင်နဲ့ ဆိုတော့ မိုးဖွားတွေက အရောင်စုံ ထွက်နေတယ်။ အဲဒီ မြင်ကွင်းထဲကို လူတစ်ယောက် ဝင်လာပါတယ်။ အေးအေးဆေးဆေး ပါပဲ။ မိုးရွာနေတာကို ဂရုစိုက်ပုံ မရဘူး။ သိတောင် သိရဲ့လား မပြောတတ်ဘူး။ သူက ဆိုင်ဘက်ကို လာနေတာ။ ဟုတ်ပါ့။ ကျွန်တော် ထိုင်နေတာ အရက်ဖြူဆိုင် ပါပဲ။ စွဲစွဲလမ်းလမ်းကြီး မဟုတ် ပေမယ့် မကြာမကြာ ထိုင်ဖြစ်ခဲ့ပါတယ်။

စောစောက ပြောတဲ့လူဟာ အရက်ဆိုင်အဝ ရောက်တော့ ရေတွေကို ခါချပါတယ်။ တစ်ကိုယ်လုံး ရွှဲနစ်ပြီး ရေပေါက်တွေက တောက်တောက်ကျ နေတာကိုး။ ထီး မပါ ဘာ မပါနဲ့။

သူက ဆိုင်ထဲကို လှမ်းပြီး အကဲခတ်တယ်။ ဆိုင်မှာက ဘက်ထရီ မီးရောင်နဲ့ ဆိုတော့ မှုန်ပျပျပေါ့။ ခဏနေတော့ သူဟာ ကျွန်တော် ထိုင်နေတဲ့ စားပွဲဆီကို တန်းတန်းမတ်မတ်ကြီး လျှောက်လာလေရဲ့။ အနားရောက်တော့ ကျွန်တော့်ကို ခပ်ပြုံးပြုံး စေ့စေ့ကြည့်တယ်။ ကြည့်ရတာ အရောတဝင် လုပ်မယ့် သဘောပဲ။ လူပုံကတော့ သာမန်ပါ။ အဝတ်အစားလည်း သပ်သပ်ရပ်ရပ် ရှိပါတယ်။ အသက်က ၆၀ လောက် ရှိပါလိမ့်မယ်။

"ကျွန်တော် ထိုင်လို့ ရမလား"

ပြဿနာက စပါပြီ။ ကျွန်တော်က တစ်ယောက်တည်း သောက်တတ်တာ ဒါပေမဲ့ ကျွန်တော့်နေရာက ထောင့်ကွေးမှာ ဆိုတော့ နှစ်ယောက် ထိုင်လို့ရတယ်။ ဒီကိစ္စအတွက် တွက်ကပ်စရာ မလိုပေမဲ့ သူ့ပုံစံက စောစောက ပြောသလို အရောဝင်မယ့်သဘော ရှိနေတော့ စိတ်ထဲ သိပ်မသန့်လှဘူး။ ဒါပေမဲ့ ကိုယ့်ဆိုင်မှ မဟုတ်ဘဲ။ ခေါင်းညိတ်ပြလိုက် ရတော့တာပေါ့။ သူက ကျေးဇူးပဲလို့ ပြောပြီး ကိုယ်ပေါ်က ရေတွေကို လက်နဲ့သပ် စစ်ချရင်း မျက်နှာချင်းဆိုင် ဝင်ထိုင်လိုက်ပါတယ်။

တစ်ခုခု ပြောချင်နေပုံပေမယ့် အပြောခက်နေ သလိုပဲ။ အရက်လည်း လှမ်းမမှာသေးဘူး။ ဒီတော့ ကပ်တီး မူးလဲများလားလို့ ထင်မိ သေးတယ်။ ဒါပေမဲ့ သူ့ပုံစံက ကပ်သောက်မယ့် ပုံစံတော့ မဟုတ်ပါဘူး။ မပြောနိုင်ဘူးလေ။ အဝတ်အစား သပ်ရပ်ပေမဲ့ အရက်ဆာ လာရင် လူတွေဟာ သိက္ခာမှ မရှိတော့တာကိုး။ ကိုယ့်ဆီက ကပ်မသောက်ဘူးပဲ ထားဦး။ ကျွန်တော့်မှာတော့ စိတ်ကျဉ်းကျပ် သွားရပါပြီ။

ခဏနေတော့ သူက ချောင်းတစ်ချက် ဟန့်ပြီး "စာရေးဆရာ ကိုမာယာ ဟုတ်ပါတယ်နော်"

စိတ်ထဲ နည်းနည်းတော့ ပျော်သွားသလိုပဲ။ ကျွန်တော်က ၀တ္ထုတိုရေးသမားပါ။ လုံးချင်းတွေ ဘာတွေနဲ့ နာမည်ကြီး မဟုတ်ပါဘူး။ သုံးလေးငါးလလောက်နေမှ ဝတ္ထုတိုကလေး တစ်ပုဒ် စာမျက်နှာပေါ် ရောက်တတ်တာ မဟုတ်လား၊ ခုလို သူက ကျွန်တော့် ကလောင် နာမည်ကို သိနေတော့ ကျေနပ်မိတာ အမှန်ပါပဲ။ နော့ပေမယ့် တချို့လူတွေဟာ အရက် ကပ်သောက်ဖို့ ဒီလိုပဲ ချဉ်းကပ်တတ်ကြတာကိုး။ ပြီးတော့ ကျွန်တော့်ကို စာရေးဆရာမှန်း သိတာက ဆိုင်ရှင် 'မွန်ကြီး' ပဲ ရှိတယ်။ ဒီတော့ သူဟာ ကျွန်တော့်အကြောင်း မွန်ကြီးဆီက ကြာထားတာလား မသိဘူး။ စိတ်ထဲ တထင့်ထင့် ဖြစ်နေတုန်း

"မွန်ကြီးရေ တစ်ပိုင်းပေးကွာ" ဆိုပြီး လှမ်းမှာလိုက်တော့မှ စိတ်ထဲ နည်းနည်းတော့ ဘဝင်ကျသွားတယ်။ နော့ပေမယ့်လည်း အရက် ကပ်မသောက်တဲ့တိုင် အပိုဆာဒါး စကားတွေ ပြောတော့မယ် ဆိုတာတော့ သိနေပါတယ်။ စာရေးဆရာ မဟုတ်လားလို့ မေးလိုက် ကတည်းက စာဖတ်သူ တစ်ယောက် အဖြစ်နဲ့ စာအကြောင်း ပေအကြောင်းတွေ လေရှည်နေရင် ခက်ပါတယ်။ ကျွန်တော်က အရက်သောက်ရင်း လက်ဖက်ရည်ဆိုင် ထိုင်ရင်း စိတ်အပန်းဖြေချင်တာပဲ ရှိတယ်။ မလေးနက်ချင်ဘူး။ သူက ရောက်လာတဲ့ အရက်ဖြူကို တစ်ကျိုက်နှစ်ကျိုက် သောက်လိုက်ပါတယ်။ ပြီးမှ မထင်မှတ်တဲ့ စကားကို ပြောပါတယ်။

"ဆရာလေးဟာ မိန်းမတစ်ယောက်က ပါးရိုက်တာကို ခံရဖူးသလား" တဲ့။

ကျွန်တော့်မှာ ဘယ်လိုကြီးမှန်းမသိ ဖြစ်သွားရတယ်။ ဒီလ 'ဝတ်မှုန်ကြွေ' မဂ္ဂဇင်း မှာ ကျွန်တော့်ရဲ့ အချစ်ဝတ္ထုတစ်ပုဒ် ပါတယ်။ မမနဲ့ မောင်လေး ဇာတ်ပါ။ အဲဒီမှာ ဇာတ်သိမ်းတော့ မမက မောင်လေးကို ဖျန်းခနဲနေအောင် ပါးရိုက်ပြီး အဖြေပေးလိုက်တာကို ရေးထား ပါတယ်။ သူ့မေးခွန်းက ငါ့ကို ရည်ရွယ်တာ ဖြစ်မယ်။ သူ့အသံက ပါးရိုက်ခံဖူး၊ မခံဖူး ဆိုတာကို စစ်ကြောချင်ဟန် ပေါ်နေတယ်။ ပါးရိုက် မခံဖူးဘဲနဲ့ ရေးသလားလို့များ မေးချင်တာလည်း ဖြစ်နိုင်ပါတယ်။ သူ စရောက်လာကတည်းက စကားတစ်လုံးမှ မပြောခဲ့တဲ့ ကျွန်တော်ဟာ ဒီမေးခွန်းအတွက်တော့ အဖြေပေးရပါတော့မယ်။

"ကျွန်တော့်မှာ ချစ်သူတောင် မရှိပါဘူး"

သူက "ဟက်" ခနဲ ရယ်တယ်။ လှောင်တာတော့ မဟုတ်ပါဘူး။ ဖြစ်မှ ဖြစ်ရလေဆိုတဲ့ အသံမျိုးပါ။ ဒီ့နောက်တော့ တော်တော်ကြာအောင် ကိုယ့်အရက်ကိုယ် သောက်နေကြ ပါတယ်။ သူ့အရက်တစ်ပိုင်း ကုန်သွားတော့ ထပ်မှာပြန်တယ်။ အဲဒီကစပြီး သူကချည်း စကားတွေ ပြောတော့တာပါပဲ။ အသက်ချင်း ကွာပေမယ့် သူက 'ဆရာလေး' ‘ကျွန်တော်’ ဆိုတဲ့ နာမ်စားတွေကိုပဲ သုံးပါတယ်။

"ချစ်သူတောင် မရှိဖူးဘူးဆိုတဲ့ ဆရာလေးကို ပြောရတာတော့ အတော် ခက်တာပဲ။ ဒါပေမဲ့ ကျေးဇူးပြုပြီး ကျွန်တော့် စကားတွေကို နားထောင်ပေးပါ"

"သိပ်အရှည်ကြီးတော့ မပြောနဲ့ကွာ" ဆိုတဲ့ အမူအရာ လုပ်ပြရပါတယ်။

"ကျွန်တော်တို့ လင်မယားက ငယ်လင် ငယ်မယားပါ။ သမီးရည်းစား အဖြစ်လည်း တစ်ယောက်ဆို တစ်ယောက်ပါပဲ။ ဘာပြဿနာမှ မရှိခဲ့ပါဘူး။ ကျွန်တော့်အသက် ငါးဆယ်လောက် အထိပေါ့ဗျာ။ ခု ကျွန်တော့်အသက် ၆၀ စွန်းပြီ ဆိုပါတော့"

သည်လို ဆိုတော့ ပြီးခဲ့တဲ့ ဆယ်နှစ် ကျော်ကျော်လောက် အတွင်း အိမ်ထောင်ရေး ပြဿနာတွေ ရှိခဲ့တယ်လို့ ဆိုသလိုပါပဲ။

"အဲဒီ နောက်ပိုင်းတော့ သူဟာ အေးစက်စက် နိုင်လာပါတယ်။ သားသမီးတွေကလည်း အရွယ်ကလေးတွေ ရလာပြီကိုး။ ပြောရရင် သူဟာ လူကြီးဆန်လာတာ နည်းနည်း လွန်သလိုပဲ၊ ချက်ရေးပြုတ်ရေး သားသမီးတွေ ကိစ္စနဲ့ အချိန်ကုန်တာ များလာတယ်"

ဒီလိုပဲ ဖြစ်တတ်တာပဲလို့ ကျွန်တော် စကား ဝင်မထောက် ဖြစ်ပါဘူး။

"ကျွန်တော်က သဘောကို သိပါတယ်။ ဒါကြောင့် အဲဒီ အရွယ်မှာ ဒါလောက်တော့ မရင့်ကျက်သင့်ဘူးဗျာ၊ ကျွန်တော်ကတော့ လေးဆယ်ကျော် ငါးဆယ်တွင်း ဆိုတာ မကြီးသေးပါဘူး"

သူက သူ့စကားသူ သဘောကျပြီး ရယ်ပါတယ်။

"ပြောရရင်ဗျာ။ အဲဒီ အရွယ်တွေမှာ အငယ်အနှောင်း ထားတတ်ကြတယ် မဟုတ်လား။ ဒါပေမဲ့ ကျွန်တော်ကတော့ သူ့ကို သစ္စာမဖောက်တဲ့ အပြင် ပိုပြီးတောင် ရောရောဝင်ဝင် နေခဲ့ပါတယ်။ ပြောရရင် ချစ်သူလိုရော၊ လင်မယားလိုရော၊ သူငယ်ချင်းလိုရောပါပဲ"

စိတ်ထဲ ထင့်ခနဲ ဖြစ်ရတယ်။ အဲဒီ မိန်းမက ဖောက်ပြန် သွားလို့လားပေါ့လေ။

"ဒါပေမဲ့ဗျာ၊ သူ့ဘက်က ပိုပို ဆိုးလာပါတယ်။ ကျွန်တော့်ကို ဟက်ဟက်ပက်ပက် မဆက်ဆံတော့ဘူး။ အလုပ်ဝင်စ သမီးကြီးနဲ့ပဲ တတွဲတွဲ လုပ်နေပါရော"

ကျွန်တော်လည်း သူ့ဇာတ်လမ်းရိုးကြီး မဆုံးသေးတာ စိတ်မရှည်လို့ အရက်ဖြူတစ်စိတ် ထပ်မှာရတယ်။

"အင်း ဆရာလေးလည်း ရိုးအီနေတဲ့ ဓာတ်ပြားဟောင်းကြီး နားထောင်နေရတာ ပျင်းရောပေါ့လေ၊ ကျွန်တော် လိုရင်းပဲ ပြောပါတော့မယ်"

ဒီလိုတော့လည်း အလိုက်သိတတ်သားပါလား။ ဒါပေမဲ့ သူ့စကားကြောင့် နည်းနည်း စိတ်ဝင်စား သွားမိတာတော့ အမှန်ပါပဲ။ ရှေ့ဆက်ပြီး ပြဿနာ ကြီးကြီးမားမား တစ်ခုတော့ ပေါ်မှာ သေချာပါပြီ။ ကြီးကြီးမားမား မဟုတ်တောင် အလှည့်အပြောင်းလေးတော့ ရှိတန် ကောင်းပါရဲ့။

"သူဟာ နောက်ပိုင်းမှာ ပိုပြီး အေးစက်သထက် အေးစက်လာပါတယ်။ ကျွန်တော့် ကို အရန်လူလို သဘောထားပြီး သားတွေ သမီးတွေ နဲ့ပဲ တရုန်းရုန်း နေတယ်။ စဉ်းစားကြည့်ဗျာ၊ ပင်ကိုက အေးစက်စက်ဆိုရင် ကလေးတွေနဲ့လည်း အလိုက်အထိုက်ပဲ နေသင့်တာပေါ့။ ခုတော့ဗျာ ကျွန်တော့်မှာ အထီးကျန်သလို ခံစားနေတယ်"

ဇာတ်ရှိန်ကလည်း ခုထိ မတက်သေးပါဘူးလို့ စိတ်ညစ်မိပြန်ပါတယ်။ သူကတော့ အရှိန်ရလာလို့ နောက်တစ်စိတ် ထပ်မှာပြန်ရော။

"ခုနောက်ပိုင်း သားသမီးတွေ ဘွဲ့ရ အလုပ်ကိုယ်စီ ဖြစ်လာကြတော့ ပိုဆိုးတာပေါ့ဗျာ။ ကျွန်တော်ကလည်း ပင်စင်ယူလိုက်ရပြီကိုး"

အဲဒီ အတွက်တော့ စာနာမိတာ အမှန်ပါပဲ။ ပင်စင်နာ ဆိုတာ ဖြစ်နေပုံ ရပါရဲ့။ ဒါပေမဲ့ အဲဒါလောက်နဲ့တော့ သူ့ဇာတ်ကို သိမ်းလို့ မရပါဘူး။

"ကြားဖြတ် ပြောရဦးမယ်ဗျ၊ ကျွန်တော့်မှာ အပြစ်ဆိုလို့ သောက်တတ်တာလေးပဲ ရှိတာပါ။ ရမ်းရမ်းကားကားလည်း မဟုတ်ပါဘူး။ အဲဒီအတွက်တော့ ခဏခဏ စကားများရတာ အမှန်ပါပဲ။ နော့်ပေမယ့်ပေါ့ဗျာ။ ဒီအရက် ကိစ္စလေးနဲ့တော့ သူဟာ ခုလောက် အေးစက်စက်ကြီး မဖြစ်သင့်ပါဘူး၊ ခုတော့ဗျာ"

သူက ရောက်လာတဲ့ အရက်တစ်စိတ်ကို တစ်ခွက်တည်း မော့လိုက်ပြန်ပါတယ်။ ပြီးတော့မှ

"သူဟာ သွေးနဲ့ကိုယ် သားနဲ့ကိုယ် ဆိုတာမှ ဟုတ်ရဲ့လားလို့တောင် ထင်ရတယ်"

ဪ လက်စသတ်တော့ အိမ်ထောင်ရေးသုခကို ပြောချင်နေတာပါလား။ ဒီအရွယ်ကြီးကျမှ လို့တော့ မထင်ရက်ပါဘူး။ ယောက်ျား ဆိုတာက ဖွဲတစ်ဆုပ်နိုင်ရင် သုခ ခံစားချင်တာပဲ မဟုတ်လား။ တစ်ခုရှိတာက သူ့မိန်းမဟာ ဘယ်အရွယ်လဲ ဆိုတာ ကျွန်တော် မသိဘူး။ သက်တူရွယ်တူ ဆိုရင်တော့ ဒါမျိုး စိတ်အေး သွားလောက်ပါပြီ။ ကျွန်တော် ဖတ်ဖူး မှတ်ဖူးတာကို ပြောတာပါ။

"ကိုင်း ကိုင်း ဆရာလေးလည်း ပျင်းနေရော့မယ်၊ ဇာတ်သိမ်းကြပါစို့။ မနက်ကတော့ သူနဲ့ကျွန်တော် အကြီးအကျယ် ရန်ဖြစ်ကြတယ်။ အကြောင်းကတော့ မောနင်းပက် လုပ်မိရာက စတာပါပဲ။ ကျွန်တော် မနေ့ညက သူငယ်ချင်းအိမ်မှာ အတော်များသွားလို့ မနက်က ဖြေတာပါဗျာ။ အဲဒါကို ပြဿနာလုပ်ပြီး ကျွန်တော့်ကို ပေယျာလကန် ထားခဲ့သမျှကို အတိုးချပြီး ရန်စွယ်ငေါငေါ လုပ်တော့တာပဲ"

သူက တော်တော် သောက်နိုင်ပုံ ရပါတယ်။ မွန်ကြီးဆီ လှမ်းပြီး နှစ်ပက် ထပ်တောင်း ပါတယ်။

"ခက်တာက ကျွန်တော် ပြန်လည် ခုခံပေမယ့် သားသမီးတွေကပါ သူ့ဘက်က ဝိုင်းပြီး ကျွန်တော့်ကို ထိုးနှက်ကြတာပါပဲ။ သားကြီးဆိုရင် ကျွန်တော့်ကို မသုံးစဖူး ခင်ဗျားကြီး ဆိုပြီး သုံးတယ်ဗျာ။ ကျွန်တော် တော်တော် စိတ်ထိခိုက် သွားတယ်။ ဒေါသလည်း ဖြစ်သွားတယ်"

သူက ဝမ်းနည်းသံ ပါသွားတာ သတိထားမိပုံ ရတယ်။ စကား မဆက်သေးဘဲ ငြိမ်ပြီး တံတွေးမျိုချ နေလေရဲ့။

"လင်မယား ရန်ဖြစ်ပြီ ဆိုတော့ အသေးအဖွဲကအစ ငယ်ကျိုးငယ်နာတွေ ဖော်ကြတော့တာပေါ့ဗျာ၊ ဒီမှာတင် ကျွန်တော်က သူ့ကို သူ့ရဲ့ ငယ်သူငယ်ချင်း ယောက်ျားလေး သူငယ်ချင်းပေါ့ဗျာ၊ အဲဒါကို သူနဲ့ ပြန်ပေးစားမိတယ်။ တကယ်က သူ့ကို ဟိုက ကြိုက်ခဲ့တာ၊ သူက ပြန်ကြိုက်ခဲ့တာ မဟုတ်ပါဘူး။ ဒါပေမဲ့ဗျာ အဲဒီ စကားလေး တစ်ခွန်းက"

ဆိုပြီး နောက်ရောက်လာတဲ့ အရက်ကို တစ်ခွက်တည်း မော့ချလိုက်ပါတယ်။ ပြီးတော့ ဆတ်ခနဲ မတ်တတ်ထရပ်တာ ယိမ်းထိုးသွား တယ်။ ဘာမပြော ညာမပြောနဲ့ ပြန်ဖို့ ဟန်ပြင်လိုက်ပါတယ်။

"အဲဒါပါပဲဗျာ၊ ဆရာလေး၊ မိန်းမတစ်ယောက် ပါးရိုက်တာ ခံရဖူးသလားလို့"

ငိုသံပါကြီးနဲ့ ပြောပြောဆိုဆို သူထွက်သွားပါတယ်။ ဝင်လာစဉ်ကအတိုင်း မိုးရွာနေတာကို မသိသလို လမ်းမပေါ် လျှောက်သွားပါရော။ လူကတော့ ဝင်လာခါစကလို ပုံမှန် မဟုတ်ဘူးပေါ့လေ။ ယိုင်ထိုး ယိုင်ထိုးနဲ့။ ဒီတော့မှ ကျွန်တော့်မှာ ဆန့်တငံ့ငံ့ ဖြစ်ရပါတော့တယ်။ သူ ဘာပြောချင်တာပါလိမ့်။ အင်း ကိုယ်ကလည်း အိမ်ထောင်မကျဖူးတော့ တွေးရခက်ကြီးပေါ့။

သုမောင်

ပင်မစာမျက်နှာသို့ပြန်သွားမည် >>

နေ့စဉ် အသစ်အသစ်သော သတင်းများ ကို သိရှိနိုင်ရန် လိုတရ Application အား ဤနေရာတွင် နှိပ်၍ အခမဲ့ Download ရယူပါ။