Lotayamm

search
မာတိကာ

contents

ထိပ်ဆုံးစာမျက်နှာ > ဝတ္ထုများ

မိုး၏ ဇီဝသီချင်း
အစ/အဆုံး
အောင်သူရ

Indeed, the direction of the furture is only there in order to elude us.
. . .Bataille. . .

မိုးတွေ တစ်နေ့လုံး ရွာလို့ လူဟာ လှေကို ကမ်းမှာ ကပ်ထားပြီး မြစ်ကမ်းပေါ်က သစ်ပင်ကြီးအောက်မှာ ကြောင်နဲ့အတူတူ မိုးခို နေတယ်။ မှောင်မဲနေတဲ့ကောင်းကင်ကနေ တစ်ချက်တစ်ချက် လျှပ်ပျက်လိုက် မိုးကြိုးတွေပစ်ချလိုက်နဲ့ ဆူညံမြည်ဟိန်းနေတယ်။

ကြောင်ကိုလူက သူ့ရဲ့မိုးကာအင်္ကျီထဲထည့်ပြီး ထွေးပွေ့ထားတယ်။ မိုးခြိမ်းသံကြားတိုင်းကြောင်ရဲ့နားရွက် ထောင်ထောင်လာပြီး လူကိုမော့မော့ကြည့်တယ်။

မြစ်ကမ်းစပ်က တိုင်မှာ ချည်ထားတဲ့ သူတို့ရဲ့ လှေကလေးကတော့ ရေလှိုင်းတွေကြောင့် တလူးလူးဖြစ်နေတယ်။ လှေကလေး ဘယ်ညာယိမ်းနေတာကို လူကမျက်လုံးသေတွေနဲ့ကြည့်နေတယ်။

မိုးခြိမ်းသံတွေထဲကနေ သီချင်းသံသဲ့သဲ့ကိုကြားလိုက်ရတယ်။

'' မျက်ရည်စလေးတွေနဲ့
တရှိုက်ရှိုက်ငိုတိုင်း
ကလေးငယ်ရဲ့မျက်နှာလေးဟာ
အသစ်တွေ့လိုက်ရတဲ့
မိုးကုတ်စက်ဝိုင်းတစ်ခု. . . . .
ဒါပေမဲ့အဲဒီမိုးကုတ်စက်ဝိုင်းဘေးက
ကျယ်ပြောတဲ့အာကာသကြီးဟာ
ကလေးငယ်ရဲ့နှလုံးသားဖြစ်နေ. . . . .

ကလေးငယ်မှာ
သွားကလေးတွေရှိတယ်. . . . .
အဲဒီသွားကလေးတွေနဲ့
လွတ်လပ်မှုကိုကိုက်ပစ်တယ်. . . . .
ကိုက်ပြီးသွားတဲ့အခါမှာလည်း
ကလေးငယ်က
လွတ်လပ်မှုကို
သဘောပေါက်သွားတယ်. . . . .
ကလေးငယ်အငိုတိတ်သွားတယ်. . . . .
ဖြစ်တည်မှုထဲကနေ
ကလေးငယ်ရဲ့ဖန်တီးမှုတွေ
စီးကျလာတယ်. . . . .
ကလေးငယ်တခစ်ခစ်နဲ့ရယ်နေတယ်. . . . .

ကလေးငယ်ဟာကလေးတွေကိုအစာကျွေးတယ်. . . . .
ကလေးတွေအစာစားတဲ့အခါ
ကလေးငယ်ရဲ့အတ္တပြည့်ဝတယ်. . . . .
ကလေးတွေအစာမစားတဲ့အခါမှာ
ကလေးငယ်ရဲ့အတ္တလွန်သဘာဝကိုထပ်တွေ့ရတယ်. . . . .
ကလေးငယ်ဟာအတ္တနဲ့အတ္တလွန်သဘာဝကြားမှာ
ချစ်စရာကောင်းဖို့အမြဲကြိုးစားတယ်. . . . .

ကလေးငယ်ရဲ့ခေါင်းကလေးဟာ
ကြီးသယောင်ယောင်. . . . .
ဆံပင်နုကလေးတွေကပ်နေတဲ့
ခေါင်းကလေးကိုရေအိုးလေးလို့
မြင်ယောင်မိရင်
မျက်ရည်တွေဟာရေအိုးကလေးထဲကျမလာ. . . . .

ပန်းပွင့်ကလေးတွေကို
ကလေးငယ်ကကြည့်တယ်။
အသီးကလေးတွေကို
ကလေးငယ်ကခူးစားတယ်။
သဘာဝတရားဟာအဲသလိုကလေးငယ်ကတစ်ဆင့်
သူ့ရဲ့အလှတရားကိုပေါ်ထင်ပြတယ်. . . . . ''

မိုးနည်းနည်းပါးသွားတယ်။ စောစောကလောက်မိုးကြိုးတွေမပစ်တော့ပေမယ့် လျှပ်စီးတွေကတော့ လက်နေတုန်းပဲ။

မြစ်ထဲကရေစီးကတော့ အတော့်ကိုသန်တယ်။ တစ်ခါတစ်ခါ အပင်တွေအုပ်လိုက်မျောပါသွားတာ ကိုတွေ့ရတယ်။

ချည်တိုင်မှာချည်ထားတဲ့လှေကလေးဟာ ရေစီးအရှိန်ကြောင့် ဟိုဘက်ဒီဘက်ပြေးနေတယ်။

လူက ကြောင်ရဲ့ခေါင်းကို ဖြည်းဖြည်းချင်း ပွတ်သပ်ပေးနေတယ်။ ကြောင်ကလည်း အမြီးကို တလှုပ်လှုပ်လုပ်ရင်း လူကို စကားပြန်ပြောနေတယ်။ လေတွေတိုက်ပြီး မိုးမိထားတဲ့လူဟာ တဆတ်ဆတ်တုန်ပြီး ချမ်းနေတယ်။ ကြောင်ကို တတ်နိင်သမျှ ထွေးပေးထားပေမယ့် အနွေးဓာတ်ကို လိုသလောက်မရဘူး။ တစ်ချက်တစ်ချက် တိုက်သွားတဲ့လေကြောင့် လူဟာ ခိုက်ခိုက်တုန် သွားတယ်။ ခါးကိုပိုကွေးပြီး ကိုယ်ကို ပိုပြီးကျုံ့ထားလိုက်တယ်။

သီချင်းသံဟာ မိုးသံတွေကြားမှာ လွင့်မျောနေတုန်း။

'' ကလေးငယ်ရဲ့ခြေဖဝါးလေးတွေဟာ
ပျေ့ာပျော့ကလေး. . . . .
ဒါနဲ့တောင်လေလိုနူးညံ့တဲ့
အချိုးကွေ့တွေမှာ
အလင်းစတွေတောက်ပလို့နေ. . . . .

ကလေးငယ်ဟာ
စာတိုကလေးတွေရေး. . . . .
ရေးတဲ့အခါမှာလည်း
စာတိုကလေးတွေထဲကဝေဒနာတွေကို
နှိုက်ထုတ်ပစ်တယ်. . . . .
ဒါကြောင့်စာတိုကလေးတွေဟာ
ကလေးငယ်ဆော့ကစားတဲ့
ဖြူစင်မှုစက်ရုပ်ကလေးတွေဖြစ်လာတယ်. . . . .''

သီချင်းသံတဖြည်းဖြည်းနဲ့တိမ်သွားတယ်။

လူနဲ့ကြောင်ဟာ သီချင်းသံကိုဆက်ကြားရဦးမလားဆိုတဲ့မျှော်လင့်ချက်နဲ့ ဆက်ပြီးနားစွင့်နေတယ်။ ဒါပေမဲ့ သီချင်းသံဟာ တိမ်ဝင်သွားပြီး စုန်းစုန်းမြုပ် ပျောက်ကွယ်သွားတယ်။ မိုးခြိမ်းသံတွေနဲ့အတူ ပျောက်ကွယ်သွားတယ်။

မိုးစဲသွားသွားချင်းပဲ နေထွက်လာတယ်။ မှောင်မဲနေတဲ့ပတ်ဝန်းကျင်တစ်ခုလုံးမှာ နေရောင်ခြည်သမ်းလာတယ်။ နေရောင်နဲ့ အတူပါလာတဲ့ အပူရှိန်ကြောင့် လူဟာအချမ်းသက်သာလာတယ်။ ရင်ဘတ်ထဲမှာထွေးထားတဲ့ အမွေးစိုနေတဲ့ကြောင်ကိုလည်း မြေပေါ်ကိုချပေးလိုက်တယ်။ လူလည်းနေရောင်ခြည်ကောင်းကောင်းရနိုင်မယ့် နေရာကိုလျှောက်သွားပြီး နေပူစာလှုံနေတယ်။ ကြောင်ကလည်းသူ့အနားကို ပြေးလိုက်ပြီး နစ်ဦးသားနေပူစာလှုံနေကြတယ်။

မြစ်ထဲကရေတွေ ငြိမ်သွားတယ်။ လှေလည်းသိပ်မလှုပ်တော့ဘူး။ နေရောင်ကြောင့်မြစ်ထဲကရေတွေ ရွှေရောင်သမ်းလာတယ်။

နေရောင်ထိသွားလို့ လှေထဲမှာရှိတဲ့ရိုင်ဖယ် လက်ကနဲဖြစ်သွားတာကို လူကတွေ့လိုက်ရတယ်။

ကျောပိုးအိတ်တွေကတော့ ရွှဲရွှဲစိုနေပြီ။

နေထိသွားလို့ကျောပိုးအိတ်အစိုပြန်လာပြီး အငွေ့တွေထွက်လာတယ်။

. . . . . . . . . . . . . . . . . . . . . . . . . . . . . .

အောင်သူရ

ပင်မစာမျက်နှာသို့ပြန်သွားမည် >>